Ралповски: Синдикалните лидери често се вознемирувани на работните места затоа што се занимаваат со работничките права

Работничките права се на најниско ниво од осамостојувањето на Македонија. Во март е забележана инфлација од 2 посто, а покачувањето на минималната плата е 1,7 посто. Боледувањето како последица од Ковид-19 мора да се исплатува сто проценти и да се воведе неработна недела. Владата наместо да ги спроведува законите, носи одредени заклучоци,затоа ние утре одиме на протест, рече денеска претседателот на Конфедерацијата на слободни синдикати, Благоја Ралповски.

-Ние имаме дијалог со претставници на владата, но тој дијалог слободно можам да кажам дека е само формален, бидејќи досега ништо не се променило на подобро.Тоа покажува дека постои големо самоволие и дека не се почитуваат законите. А потоа следува малтретирање на синдикалните лидери, непочитување на синдикалните организации и непочитување на Законот за делот од трудовото право, алармира Ралповски.

Тој вели дека сите сектори се подеднакво загрозени кога станува збор за работничките права.

-Правата на работниците се подеднакво загрозени и во јавниот и во приватниот сектор. Голем број работници ги изгубија работните места и немаат никакви приходи, други пак не добија плати иако газдите добија финансиска помош од државата, а институциите ги толерираат и не планираат да поведат постапка против нив. Работникот е на најниско ниво, осиромашен и доведен во тешка ситуација. Во јавната администрација има вработено 120 000 работници, а 48 проценти од нив се со средно образование и тие имаат минимална плата во моментов. Тешко е да се преброди не само здравствената криза, туку и економската криза исто така. Притисокот за излегување на протест беше од самото членство на Конфедерацијата на синдикати, и одлуката да се протестира ја одобрија сите, нагласува претседателот на КСС.

Тој најавува серија протести, доколку од утрешниот протест не се добијат очекуваните резултати.

-Протестот започнува во 16 часот од булевар „Гоце Делчев“, спроти МРТВ, ќе се движиме кон Црвен Крст до Собранието на Македонија , од причина што Законодавниот дом е тој што ги носи законите, сакаме да излезат и да видат во каква состојба се работниците. Потоа продолжуваме кон Министерството за правда и на крај завршуваме пред Владата на Македонија. Очигледно е дека социјалниот дијалог на маса не вродува со плод, затоа имаме намера на ваков начин да им покажеме дека правата на работниците се загрозени. Сите закони од трудовата област секојдневно се кршат и тоа мора да престане, смета Ралповски.

Ралповски тврди дека синдикалните лидери често се вознемирувани на работните места затоа што се занимаваат со работничките права

Секогаш кога КСС го подигнува гласот низ институциите на системот, тогаш доаѓа до пресметка со синдикалните лидери и синдикалните организации. Затоа велиме доста е! Мора да запре прогонот на синдикалните лидери, едноставно се претера со самоволието на одредени лица кои се на власт. Лично јас добив отказ затоа што три дена не сум бил на работа, а сум имал синдикални активности. Случајот го добив и на првостепен, второстепен и на врховен суд на ревизија, но не ме вратија на работа. Имаме примери кога министерот Спасовски престана да ја одбива чланарината на нашиот синдикат во полицијата, имаме судска пресуда во Елем која кажува дека сите членови кои биле административно одземени, така треба да бидат и вратени, а директорот не сака да ја спроведе. Претседателот на затворите во Македонија беше преместен од затворот Шутка во затворот во Идризово, иако е тоа спротивно на Законот за спроведување на санкции, само затоа што застана позади колегите кои беа на дисциплинска постапка и добија отказ од работа. Ова се само неколку примери од голготата низ која поминуваат синдикалните лидери, вели Ралповски.