Спасеновска за наградата: Не употребувајте англицизми кога сакате да звучите паметно

Заложбата да им ја пренесам на граѓаните и политичарите идејата дека треба да зборуваат македонски литературен јазик, а не јазик преполн со англицизми ми ја донесе високата награда од Дирекцијата за култура и уметност на Град Скопје, по повод сто години од раѓањето на Блаже Конески. Ова денеска во Утрински брифинг го истакна новинарката Елизабета Дамјаноска Спасеновска, која е една од наградените на манифестацијата Денови на Европско Скопје, во рамки на одбележувањето на 13 Ноември.

– Тоа што отсекогаш го зборував со моите соработници и пријатели, одлучив да го напишам за да го прочитаат што е можно повеќе луѓе. Забележувам дека луѓето кога сакаат да звучат паметно, честопати употребуваат англицизми, што е сосема погрешно. Мојата идеја беше да се нагласи дека и кога зборуваме литературно македонски, без употреба на англицизми може да звучиме паметно и да оставиме впечаток дека ја разбираме темата за која се обраќаме, рече Спасеновска.

Таа вели дека некои англицизми се  толку навлезени во македонскиот јазик, што за момент како да подзабораваме кои се адекватните синоними на македонски.

Лицемерно би било да зборуваме за зачувување на македонскиот јазик ако во годината кога одбележуваме сто години од раѓањето на великанот една од најзначајните личности во македонската историја, Блаже Конески, нашиот врвен поет, книжевник, литературен научник, не се посветиме на исфрлување од употреба на странски зборови за кои имаме одлични синоними во македонскиот јазик. Наместо „сквер“, јас велам „плоштад“, наместо „информира“ јас велам „известува“, а наместо „стартува“, велам „почнува“. Некои англицизми се  толку навлезени во македонскиот јазик, што практично ги забораваме адекватните синоними на македонски, додава колешката Спасеновска.