Средношколците подготвуваат шатори за пред МОН и масовни протести ако не им се прифатат барањата

Од денеска матурантте повторно се враќаат на настава. Двонеделниот бојкот заврши, а претседателот на Сојузот на средношколци, Бленди Ходаи вели дека таквата одлука е донесена поради високите очекувања од пленарната седница која треба да се свика наредната недела, а на која ќе се дискутира за промените во образованието.

-Имаме поддршка од над 70 пратеници во Законодавниот дом. Тоа значи дека за наредната недела треба да се свика пленарна седница на која ќе се гласа за промените во законот за средно образование и да се дозволи само оваа година да се дозволи државна матура да се полага со два предмета и проектната задача. Нема да престанеме со борбата, Присисоците ќе престанат кога ќе бидат прифатени нашите барања. Одлучивме да се вратиме на наставата, за да не губиме повеќе часови додека трае процедурата за свикување на пленарната седница, вели Ходаи. Тој најавува радикализирање на мерките кои ќе ги преземат матурантите, во случај да не бидат прифатени нивните барања.

– Доколку нашите барања не бидат прифатени сите матуранти од државата ќе излезат на масовни протести, а исто така подготвуваме и шатори кои ќе ги поставиме пред Министерството за образование и наука и таму ќе останеме се додека министерката Царовска не одлучи да ги прифати нашите барања, нагласува Ходаи. Тој додава дека нивните барања се рационални и нема да имаат негативно влијание при упис на факултетите во земјава и странство.

-Што се однесува на изостаноците, не верувам дека на над 20.000 матуранти кои што ја бојкотираа наставата можат да им се напишат неоправдани изостаноци. Сепак, ние ќе ги надоместиме изгубените часови, затоа што сакаме да учиме и да се подготвиме за полагање на државна матура со полагање на два предмета, завршува претседателот на Сојузот на средношколци.