Тасевски: Струшките вечери на поезијата ќе се вклучат во јубилејот на Блаже Конески со специјални програмски содржини и изданија
Во седиштето на УНЕСКО во Париз, денеска во 16 часот ќе се одржи чествување на 100-годишнината од раѓањето на великанот на македонската култура Блаже Конески, јубилеј кој е дел од календарот на важни меѓународни јубилеи на УНЕСКО. Во рамките на овој настан ќе биде соопштен лауреатот на годинашното, 60. издание на Струшките вечери на поезијата и добитникот на наградата „Мостови на Струга“, која се доделува во соработка со УНЕСКО.
„Во рамките на овој настан, кој е дел од Националната програма „2021 – Година во чест на Блаже Конески”, која се реализира под покровителство на претседателот Стево Пендаровски, всушност се возобновува традицијата токму во седиштето на УНЕСКО да бидат прогласени добитникот на Златниот венец и на наградата „Мостови“. Годинава се одбележуваа 60 години од Струшките вечери, тоа е значаен јубилеј, а ние подготвуваме програма и се надеваме дека ќе се реализира во вообичаениот формат и на вообичаените локации, но разбирливо, мора да бидеме подготвени за развојот на настаните и да се прилагодиме на ситуацијата со пандемијата. Очекуваме дека со процесот на вакцинирање и овде и на светско ниво, ќе се создадат услови Струшките вечери да се одржат поблиску до форматот во кој се одржува, очекуваме и гости од странство, а се очекува да дојдат и некои од досегашните лауреати, така што се подготвуваме за сите сценарија. И оваа година имаме намера да поканиме околу триесетина поети од странство.
Инаку во рамки на Струшките вечери на поезијата, како дел од одбележувањето на јубилејот на Блаже Конески, освен специјален програмски дел на манифестацијата, ќе биде објавено и специјално издание со избор од поезијата и прозата на Конески“, вели за Утрински брифинг, Тодорче Тасевски, директор на Струшките вечери на поезијата. Инаку, домаќин на денешниот настан во седиштето на УНЕСКО во Париз е амбасадорката Јадранка Чаушевска Димов, поканети се претставници на дипломатскиот кор, ќе бидат читани стихови од Блаже Конески. Годинашниот лауреат на Златниот венец на СВП, како и добитникот на наградата за дебитантска книга поезија „Мостови на Струга“, ќе ги прогласи амбасадорката Чаушевска.