Томшиќ: Учениците треба да бидат заштитени па затоа наставниците треба да се вакцинираат

-По вчерашната прес конференција на министерот Венко Филипче кој заедно со Комисијата препорачаа на работа во јавниот сектор да се оди само со примена вакција или ПЦР тест кој вработените самите ќе го плаќаат, се крена голема прашина. Од МОН се инсистира на настава со физичко присуство, вели за Утрински брифинг Душан Томшиќ, советник во МОН.

-Степенот на вакцинација и степенот на подготвеност на образовниот и здравствениот систем во согласност со Комисијата за заразни болести беше донесена одлука за настава со физичко присуство. Таа е незаменлива. Под 1 отсто е трансмисијата на ковид во рамки на училиштата и тие треба да останат отворени во интерес и на учениците и на наставниците, вели Томшиќ.

-Образовниот систем мораше брзо да се адаптира кон онлајн настава. Но сега имаме искуство и сме поподготвени. Ако има ширење на вирусот ќе се прилагодиме со комбинирана настава – дел да посетуваат настава физички, дел онлајн, а ако многу се влоши ситуацијата тогаш имаме опција за целосно онлајн настава.

Има 25 отсто невакцинирани наставници, па се поставува прашање по новата одлука како ќе се одвива наставата.

-Процентот на вакцинирани наставници е 75 отсто. Некои имаат прележано ковид. Оние малку што преостануваат ќе треба да прават ПЦР тест. Можеби ќе се зголеми рокот да се вакцинираат наставниците. Системот дозволува и заменски наставници. Никој нема присилно да биде вакциниран. Не верувам ни дека ќе има отпуштање на наставници. И во европски рамки вакцинирањето се движи во рамките на заштита при работа. Невакцинираните го шират вирусот и тој мутира. Единствена опција е вакцинација, а науката го вели тоа и ние не можеме да одиме спротивно, вели Томшиќ.

Ќе има наставници кои нема да прифатат да плаќаат сами ПЦР тест.

-Сѐ што ќе важи за јавниот сектор, ќе важи и за наставниците. Ние не можеме да одиме спротивно на јавното здравје во чиј контекст се донесени одлуките на владата и Комисијата за заразни болести. Учениците мора да бидат заштитени. Сметам дека треба да се исполни обврската, вели Томшиќ.

Синдикатот за образование вели наставниците сами да одбираат дали ќе има физичко присуство или онлајн.

-Наш став е физичко присуство сѐ додека Комисијата не предложи поинаку. Ако секој сам го одбира моделот тоа ќе биде тешко да се контролира. Ако во одредени региони има поголема стапка на заболени може регионално да се одлучи за онлајн настава. Сите размислувања на синдикатите треба да се адресираат до Комисија за заразни болести оти тие вршат надзор како се движи ситуацијата со вирусот. Вирусот се шири и надвор од училишната зграда, а училиштата треба последни да се затворат ако дојде до затворање. МОН е подготвена веднаш да постапи ако дојде до владина одлука за смена на моделот на настава, вели Томшиќ.

Целиот разговор погледнете го во видеото