? Без соодветен пристап до тоалети за управување со менструалното здравје
Менструалното здравје е тема за која многу малку се посветува внимание. Невладината организација Новинари за човекови права, пред три дена ги доби податоците од истражувањето на тема: Пристап до тоалети за управување со менструално здравје. На оваа тема денеска во Скопски агол на Утрински брифинг гостуваше Наташа Доковска.
На оваа тема работиме веќе пет години. Во 2018 направивме истражување за пристапот до вода и санитација, во кое што утврдивме дека девојчињата немаат пристап до тоалети во училиштата. Со цел да ја дознаеме состојбата со пристапот до тоалети за управување со менструална хигиена во факултетите и здравствените објекти направивме анкета во која 790 студентки одговорија дека немаат никакви услови за грижа на менструалното здравје, 810 дека нема тоалетна хартија ниту сапуни во тоалетите, а сите 850 испитанички одговориле дека нема соодветно место за селектирање на отпад во тоалетната кабина. Слична е состојбата и во здравствените установи.
Од 672 испитанички, 650 одговориле дека пристапот до тоалетите е под секое ниво и во ниеден од тоалетите нема услови за менструална хигиена, рече Доковска. Таа потсети дека благодарение на овој проект реновирале неколку тоалети во основните училишта.
Во соработка со Британската амбасада ги реновиравме тоалетите во неколку училишта, а девојчињата добија и пакети со производи за управување со менструалното здравје. Тоа го направивме и во три средни училишта со поддршка на Агенцијата за млади и спорт. И општините појавија интерес за реновирање на тоалетите во училиштата според стандардите за одржување на менструалното здравје, истакна Доковска. НВО Новинари за човекови права поведе иницијатива за намалување на ДДВ за производите за менструална хигиена.
Поведовме иницијатива за намалување на ДДВто на производите за менструална хигиена. Имаме он лајн петиција на која досега се собрани околу 5.000 потписи, а ќе собираме потписи и пред молови, со цел да го намалиме ДДВ од 18 на 5 посто, вели Доковска. Таа исто така нагласи дека состојбата со јавните тоалети во Скопје е очајна и мора да се поправи.