Д-р Митов: Заборавете на трендовите, сите успешни диети во својата основа имаат иста формула
Денес, на наша голема чест, д-р Александар Митов гостуваше во рамки на утринската емиција на Слободна.тв – „Утрински Брифинг“ разговараше за процесот на слабеење, диетите и трендовите за исхрана.
„Од здравствена гледна точка станува збор за сериозен проблем кој опфаќа милиони и милиони население. Честопати се смета дека решението е само човек да стигне до некој лист-два диета, препораки и тоа е тоа. Ова е наједноставниот начин, но и далеку малку од вистината. Затоа што ако човек има таков пристап, тоа речиси со сигурност е осудено на пропаст“, вели д-р Митов.
Како што вели, успешен процес на слабеење е првенствено ментален процес – здравјето мора да биде приритет. Така почнува приказната или разговорот со пациентот, во тоа дали, како и колку го вреднува своето здравје и колку е спремен да почне да прави нешто за да го смени.
Цунами од диети
Имајќи предвид дека Интернет просторот е преполн со најразлични диети и безброј препораки, д-р Горан објаснува дали и колку се корисни истите.
„Треба да се разбере која е генезата на проблемот. Каде се произведуваат сите овие диети. Ние на тој глобален пазар сме релативно небитни, вистинскиот пазар кој чини милијарди е американскиот пазар. Таму има силни интереси кои годишно генерираат најразлични трендови – исхрана со глутен, па без глутен, и тоа не останува само на муабет, туку на тоа се налепува цела една индустрија која почнува да произведува храна во рамките на тој нов тренд. Пред 4-5 години беше глутенот, пред 2-3 години е кето диетата“, вели тој.
Медитеранската храна како најздрава опција
Уште во 50-тите години од минатиот век науката си ја завршила работата, уште кога е дефинирана медитеранската исхрана како таква, посочува д-р Митов.
„Нашата кујна барем 70-80% е медитеранска. Зошто? Затоа што ние сме под силно влијание на турската и грчката кујна – тие се чисто медитерански кујни. Но во исто време сме под влијание на контитенталните кујни кои се тешки и се засноваат на месо и тука се создава проблемот“, вели тој.
Сите диети или повеќето луѓе кои ги држат истите главно се занимаваат со калориите. Дали тие се центарот на проблемот околу дебелеењето или има и други фактори?
„Во денот внесуваме калории и трошиме калории. Ако плусот е поголем од минусот, ако на дневна основа внесеме повеќе отколку што ќе истрошиме тие де факто вишок калории се нарекуваат калориски суфицит кои што телото ќе ги претвори во грами масно тквио. Затоа кога човек влегува во слабеење, многу е побитно да го има предвид ова, отколку да размислува за диетите“, вели д-р Митов, додавајќи дека сите успешни диети во својата основа ја имаат оваа формула – рестрикција која води до калориски дефицит.