Андоновиќ: Европа и САД и натаму на удар на коронавирусот

Ударот на коронавирусот и натаму е фокусиран врз Европа и САД. Вкупно во светот до овој момент се регистрирани 785.807 заболени од коронавирусот.

Досега починати се 37.820, а излечени се 165.659. Најголем број на заразени има во САД, вкупно 164.253, а вкупно починале 3.167.

Втора е Италија со 101.739 заразени, а починале вкупно 11.591, од каде се третина на смртните случаи во светот. Трета е Шпанија со 87.956 заболени, а 7.716 починати. Главиот извор на пандемијската зараза денска падна на четврто место по бројот на починати, вкупно 3.305 а бројката на инфицирани е 81.518.

Франција изминатото деноноќие ја мина границата од 3.000 починати од коронавирусот, а само вчера се регистрирани 418 смртни исходи, што е најголем број во еден ден од почетокот на епидемијата во земјата.

Американските епидемиолози предупредуваат дека во САД може да се заразат од 1.6 до 2.2 милиона лица, од кои од 100 до 200 илјади би починале и велат дека оваа бројка е реална доколку САД не преземат драстични мерки за сузбивање на пандемијата. Најоптимистички е бројот на заразени да биде до 200 илјади луѓе, доколку наредбите за карантин се почитуваат. Моментално, во задолжителен карантин се наоѓаат речиси две третини од вкупното население на САД. Според доегашното искуство, карантинот покажа најголем успех во запирањето на ширењето на коронавирусот.

Во Европа која е на жесток удар на пандемијата на Ковид -19, се уште трае обидот за изнаоѓање на запирањето на ширењето на заразата и лекувањето на инфицираните од коронавирусот. Франција која се соочува со растечка бројка на заразени и починати денеска предупреди дека лековите кои се препишуваат на заболените од Ковид-19 можат да предизвикаат несакани последици доколку се земаат на своја рака.

По Италија и австрискиот канцалар Себастијан Курц со критики кон ЕУ за начинот со кој се справува во сузбивањето на коронавирусот. Курц и забележува на Унијата дека досега не дала ниту еден добар предлог како да се надминат последиците од пандемијата. ЕУ ја критикуваше Австрија поради затворањето на границите. Курц вели дека доколку имало добар предлог за справување со пандемијата тој веднаш би го прифатил, но дека во недостиг на предлози за Виена е најважно да го заштити здравјето на своите граѓани. Вчера и Француската министерка за Европа предупреди дека Унијата мора да покаже поголем ефикасност во борбата против пандемијата и дека единствено солидарност, соработка и меѓусебна помош може континентот да го извади од пандемијата.

И додека европјаните се на испит околу заедништвото и солидарноста во борбата против коронавирусот, американскиот претседател Трамп најави американска помош во медицинска опрема за европските држави. Помошта се состои во респиратори и се наменети за Италија, Франција и Шпанија, а само за Италија вредноста на помошта изнесува 100 милиони долари.

Некако во втор план од настаните поврзани со коронавирусот, американскиот и рускиот претседател разговараа за состојба во светот за време на пандемијата. Сепак главниот фокус на разговор на Трамп и Путин бил околу состојбата на пазарот на нафта, разговор инициран од американска страна. Деталите од евентуалниот договор засега не се познати за јавноста.