Петровска во УБ: Намален е трендот на кражби и семејно насилство во време на карантин

Заменик министерката за внатрешни работи најави поригорозни казни за непочитувачите на полицискиот час и мерките на Владата за изолација.

Намален е трендот на разбојништва и кражби, а немаме зголемување на случаи на семејно насилство. Во исто време зголемен е бројот на непочитувачи на мерките во борбата против Ковид 19, информираше денеска во Утрински брифинг, Славјанка Петровска, заменик-министер за внатрешни работи.

„Бројката на непочитувачи на мерките, на почетокот беше минимален, но изминативе два дена има благ пораст. Во периодот кој ни претстои, свесни сме дека се ограничуваат правата на движење, но потребно е сите да се придржуваат до мерките, должни сме да постапуваме по нив. Имавме доволено време да се навикнеме и нема да се толерира никој…Статистиките од друга страна покажуваат дека трендот на разбојништва и кражби е во опаѓање, а немаме зголемен процент на семејно насилство“, изјави Петровска во Утрински брифинг.

Таа е децидна дека МВР постпаува исто за секој случај за кој имаат податоци за неодговорно однесување, а рече дека како извршна власт свесни дека може да се создаде дополнителна нервоза.

„Но ние одевме со укажувања и предупредувања, а кога ќе се види бројот на граѓани кои не го почтуваат полицискиот час, наша должност е да постапуваме“, изјави заменик-министерката Петровска.

Во однос на ситуацијата на заразени на полициски службеници, Петровска потврди два поголеми случаи, а во комуникација со епидемиолозите, 14 кои биле во контакт со полицајците, рече дека се во домашна изолација со решенија.

Славјанка Петровска брифираше дека во МВР внимателно се направени распоредите за ангажирање на полицијата, свесни дека состојбата нема да заврши наредните денови, а со цел да нема непотребен ангажман.

Оперативниот штаб во МВР, рече таа, има проценки и претпоставки како би се одвивала ситуацијата во случај да треба да се изолираат одредени области по примерот со Дебар.

„Имаме човечки ресурси за такво нешто, го зголемуваме бројот на полициски службеници а исто така учествува и армијата. Проценките ги правиме на ниво на Влада и како такви ќе ги спроведуваме и во иднина“, изјави Петровска.

Прашана за односно со министерот за внатрешни Наке Чулев, кој доаѓа од опозициската партија ВМРО ДПМНЕ, Петровска одговори:

„Во овој период на приоритет на борбата против Ковид 19, реков ќе се воздржувам од изјави за соработката. Факт е дека за одредени прашања имаме несогласувања. Тоа не значи дека ако се направи било каква штета во работењето, дека ќе се држам до правилото. На граѓаните во моментов им треба единство и максимум во соработката на институциите“, изјави заменик-министерката за внатрешни работи во Утрински брифинг.