Бочварски: Битна е инфраструктурата за поврзување со соседите, а за тоа на располагање ни стојат европски фондови

Пред почетокот на туристичката сезона повторно станува актуелна состојбата со патиштата низ државата. Магистралниот пат Кичево – Охрид е сѐ уште во градба и не се знае кога ќе биде пуштен во полн капацитет.

-Ние сега, со новите буџети и планирање на капиталните инвестиции, се обидуваме да го фатиме чекорот затоа што прашање е колку претходно се инвестирало во патнатата инфраструктура, вели министерот за транспорт и врски Благој Бочварски за Утрински брифинг.

Бочварски додава дека ако се градело како што се гради сега, автопатот Кичево-Охрид досега ќе беше готов. Тој оценува дека кога новата власт се соочила со проектот на автопатот согледале дека има нелогичности и морало да се интервенира.

-Делницата на овој автопат според проектот поминуваше преку резерворот за вода од кој се снабдува Кичево. Зарем требаше да го урнеме резервоарот и да жртвуваме цел град? Секако дека беше пологично да се промени трасата и да се помести за еден километар, но тоа предизвика загуба на време и средства оти мораше да се прават нови експропријации, вели Бочварски.

Тој информира дека постојано се работи на патиштата и им се помага на општините во градбата на регионаните патни правци.

-Важно е капиталните инвестиции да продолжат и во време на криза, иако треба да се планираат буџетите според ритамот на градење, вели Бочварски.

Во Министерството за транспорт и врски сите проекти ги сметаат за приоритетни, а станува збор не само за патните правци, туку и за гасоводите и железничките правци.

-За нас е најважен Коридорот 10 затоа што транспортните насоки на стоки за нас водат кон Солун. Но се работи и на Коридорот 8, пругата Куманово-Бељаковце, заедно со правците Бељаковце-Крива Паланка и Ногаевци-Неготино, како и поврзување на Битола со Грција преку железница со што, заедно со врската преку Гевгелија, би имале два железнички правци кон Грција. Битно е поврзувањето со соседите, а за тоа на располагање ни стојат европски фондови, вели Бочварски за Утрински брифинг.

Проследете го целиот разговор во видеото