Кузмановски: Судот одлучи – започнува обесштетувањето на граѓаните во случајот со Еуростандард банка

Конечно заврши постапката за определување на доверителите и редоследот на доверители и нивното обесштетување, информира Љупчо Кузмановски, адвокат на штедачите од пропаднатата Еуростандард банка во Утрински брифинг, пренесувајќи ја одлуката на судовите.

-Фондот за осигурување на депозити останува доверител, но се направи и промена на редоследот на доверители. Тоа што банките, државата и тн. имаа предност како доверители пред граѓаните не е фер и тоа сега е променето, вели Кузмановски.

Планот за авансната распределба на средствата вели дека физичките лица целосно ќе бидат обесштетени, освен оние лица кои имале повластени каматни стапки и тие, исто како и правните лица, ќе бидат делумно обесштетени.

-Штедачи или граѓани со трансакциски сметки се околу 600 до 700 луѓе, а привилегирани имало многу малку. Планот за распределбата на средствата е потврден од Апелацискиот суд и деновиве се очекува да започне обесштетувањето на штедачите. Лично очекував поголема реакција од правните лица, но имаше само 3 или 4 жалби освен онаа на Фондот. Веројатно станува збор за помли депозити на правните лица, вели Кузмановски за Утрински брифинг.

Статусот на случајот со Еуростандард е уште ист, банката е о стечај и ќе оди на ликвидација. -За другиот дел, колку што знам има предистражна постапка и финансиска полиција доставила информации до Обвинителството, па останува Обвинителството да одлучи дали ќе покрене постапка, вели Кузмановски.