Од 4-6 март, отворени денови на ФЕИТ
Од 4 до 6 март на Факултетот за елетротехника и информациски технологии ќе се одржат отворени денови на кои матурантите кои планираат да се запишат на овој факултет ќе можат да се информираат за студиските програми, условите за упис и начинот на студирање, рече Александра Крколева, вонреден професор на ФЕИТ.
-Ние секоја година организираме отворени денови, со таа разлика што овој пат настанот ќе се организира преку конференциска врска, односно онлајн, поради состојбата со коронавирусот.Настанот ќе трае три дена во рамки на кои ќе ги презентираме студиските програми, презентација на тоа што го работат тековните студенти, а што сметаме дека треба да се покаже пред пошироката јавност, ќе имаме популарни предавања кои се надеваме дека ќе го задржат интересот на посетителите и дел за прашања и одговори, рече Крколева.
Таа жали што поради пандемијата идните студенти не можат да го посетат факултетот и да ги видат лабораториите и останатите простории. Условите за упис на факултетот се исти како и за останатите факултети, а во јуни кога ќе излезе конкурсот ќе се знае точниот број на отворени места за упис на факултетот, но се очекува дека во државна квота ќе има слободни околу 300 места, дополнително и ќе има слободни места и групата за кофинансирање.
Филип Серафимовски, студент на четврта година на ФЕИТ вели дека студирањето на Факултетот за електротехника и информациски технологии е можност за личен раст и развој, како и за создавање на работна навика и етика.