Румена Бужаровска: Отвораме скокотливи женски теми, новото издание на ПричПич е за љубовните писма

ПичПрич, иницијативата за промовирање на женската усна историја, на 2 октомври, во Куршумли ан ја организира традиционалната гала вечер каде што ќе се раскажува за еден од најстарите и најтрадиционалните начини на додворување – љубовните писма.

„Љубовните писма е еден од најстарите начини на изразување љубов, меѓутоа постои еден момент во однос на женскоста и љубовта, како на жените да им е забрането да се изразуваат за љубовта на таков начин, особено кога се работи за писатели, бидејќи кога жената зборува за љубовта, таа се гледа како сентиментална, па како и тоа да им е одземено на жените. Живееме во дигитална ера, каде што сите се допишуваат и љубовните писма имаат еден поинаков контекст. Темата ја гледаме и малку иронично, па се надевам дека ќе зборуваме за оние „љубовни писма“ кои жените секојдневно ги добиваат во своите инбокси во форма на одредени фотографии или изрази кои всушност се вознемирување. Во традиционалната кулутура, љубовните писма се гледаат како нешто романтично, но во суштина се вознемирувања.

ПичПрич секогаш има широка тема која понатаму раскажувачките ја развиваат и толкуваат. Убавината е во тоа што ние однапред не знаеме што ќе зборуваат и тие можат темата да интерпретираат на свој начин, настпаите не мора да бидат успешни по секоја цена, важно е ние потоа критички да размслуваме за темите. ПичПрич има свои позитивни резултати: жените сакаат да бидат дел од настанот, сакаат да излезат во јавност, да ја кажат својата приказна и се ставаат во позиција да потоа луѓето и ги критикуваат за теми кои се прилично скокотливи. Отворивме прилично важжни теми: за женското здравје, табу теми во однос на женската сексуалност, зборуваме и за љубовта и за вознемирувањето, имавме радио емисија во која зборувавме за предизвиците на ин витро оплодувањето, потоа зборувавме со сексуални работници и мислам дека преку овие вечери, всушност темите ги отвораме сите заедно и затоа е многу важно раскажувачките да бидат во фокусот тие да зборуваат за аспекти на темата, а потоа да дискутираме за тоа“, вели писателката Румена Бужаровска , која заедно со Ана Василева се организаторки на ПичПрич.

Раскажувачки на женските приказни во сабота ќе бидат Елена Гаговска, Маја Казакова, Марина Костова, Ивана Смилевска, Сашка Цветковска и Катерина Ивановска. Настанот се реализира во соработка со Тиииит! Инк. и со поддршка на Фондацијата Квина тил Квина.