Шќипе Мехмети: Како жена, Албанка и уметница уште ме прашуваат дали сопругот ми дозволува да цртам
Изложбата „Women about women“ (Жени за жени), која до 30 мај ќе биде отворена во Мала станица обединува дваесет и пет визуелни уметници од Србија, Црна Гора, Хрватска, Словенија и Северна Македонија.Учеснички од С.Македонија се: Марија Милошевска, Ана Лазаревска, Тања Балаќ, Христина Зафировска и Шќипе Мехмети.
„Се’ уште треба многу да работиме за да надминеме некои предрасуди и стереотипи, бидејќи живееме во такво опкружување и менталитет, не само кај нас, туку на целиот балкански простор. Секаде е слична ситуацијата. Колку и да сакаме да кажеме – ние сме слободни како уметници, состојбата не е баш таква, а за тоа имам примери и од моето лично искуство. Токму и кураторката на оваа изложба Биљана Јотиќ нагласува дека ние преку уметноста можеме да внесеме промени во таа состојба, значи творејќи, создавајќи заедно и меѓусебно соработувајќи. Моето изразно средство е сликата, цртежот, графиката и преку нив се изразувам, тие мои дела кажуваат дека жената не треба да молчи, зборуваат за потиснатата сексуалност. Доаѓам од мала средина, од Кичево, каде уште од детството сведочев на молкот на жените што ме опкружуваа, на нивната подредена позиција. Инаку и во текот на студиите моите колеги мислеа дека ако сум жена и Албанка нема да имам храброст да направам дела какви што работам. А за тоа сведочи и една случка, кога на изложбата во Мала станица, една новинарка ме праша дали како жена, Албанка моите родители и сопругот ми дозволуваат да цртам нешто што е провокативно или експлицитно.
Јас не знаев што да одговорам. Како да сум нечија сопственост па мора да барам дозвола да цртам. И понатаму ќе останам во сферата на женските теми, чувствувам дека имам уште многу да кажам, имам многу идеи, а исто така мислам дека треба да соработуваме и со моите колешки уметници кои се многу храбри и паметни, заедно да организираме изложби, проекти затоа што само така може да промениме нешто во нашето општество полно со предрасуди и стереотипи. А и младите мора да ги едуцираме преку такви проекти, лично чувствувам одговорност кон општеството да работам на тоа поле“, вели за Утрински брифинг, Шќипе Мехмети, уметница.
Шќипе Мехмети во 2007 магистрирала на Факултетот за ликовни уметности во Скопје, учествувала на Од 2000 година, учествувала во повеќе од 50 групни изложби во земјава и странство. Самостојни изложби имала во Њујорк, Нирнберг, Висби, Скопје, Берлин, Приштина, Париз и други. Изложбата „Жени за жени“ е дел од проектот „The Rise of women in culture in Western Balkan” (Подемот на жените во културата во Западен Балкан), поддржан од Европската унија.