Љупчо Ристовски – Интегра: ВМРО-ДПМНЕ и СДСМ ни крадат гласови, но ќе ги изненадиме со „хидрогенска бомба“
Иако партијата Интегра е само 10 месеци на политичката сцена, веќе изградивме бренд.
Ова го вели лидерот на Македонската конзервативна партија – Интегра, професорот Љупчо Ристовски, во Утрински брифинг, надополнувајќи дека во претстојниот период партијата ќе структурира 33 оптштински канцеларии низ Македонија.
Коментирајќи ги партиите од македонскиот блок, Ристовски тврди дека и кај двете најголеми партии ВМРО-ДПМНЕ и СДСМ, изразени биле само примерите на коруцпија.
„На ВМРО-ДПМНЕ му фалат конзервативните вредности. Им фали вредност, доблест, чесност…во два мандати на ВМРО-ДПМНЕ имате флагрантни примери на корупција, прислушување и сеење страв помеѓу граѓаните. Ги затрупаа граѓаните со инспекции и со страв. За волја на вистината слично е и со СДСМ. И кај нив има глупости и корупција колку сакате“, изјави Ристовски.
На прашањето колку мандати очекува неговата партија, дали ќе настапи сама на изборите и дали би влегла во владина коалиција со другите партии од македонскиот и албанскиот блок, Ристовски одговара:
Очекуваме околу 30 мандати. Во оваа фаза разговараме со промакедонскиот-патриотскиот блок. Не ја исклучуваме можноста да коалицираме со партиите, но во овој момент исклучени се двата блока, сега „газиме“ сами.
Љупчо Ристовски
Не патиме од суета, има можност да се преговара. Но, вредностите на Интегра мора да бидат доминантни во формирањето на владината коалицијата. Ова е радикален пресврт, подготвени сме дури и да ја турнеме владата на нови избори доколку не биде така“.
Ристовски, кој важи за жесток критичар на Преспанскиот договор уште еднаш ја нагласи идејата за поништување на договорот. Смета дека го негира правото на Македонците на самоопределување, и покрај тоа што, аналитичарите велат дека еден меѓународно ратификуван и признат договор од светските сили, ја отежнува таквата можност во реалноста.
Ексклузивно за Утрински брифинг, Ристовски најави иновативна изборна платформа за претстојните избори.
„Настапуваме сами со иновативна изборна платформа која ќе биде хидрогенска бомба и за СДСМ и за ВМРО-ДПМНЕ. Ќе кажеме за што се работи во текот на кампањата, односно како ни ги крадат и двете партии гласовите, но ќе се изненади и јавноста. Ендру Блоу ќе ни ја води кампањата, кој е менаџер-директор за Австралија на TG компанија која ја водеше кампањата на Борис Џонсон и поранешен секретар во владата на Тони Абот.
Имаме силна поддршка од меѓународните пријатели, заклучи лидерот на Интегра.