? Иванов: ДУИ го етнизира општеството, реториката „Албанец-премиер“ и припаѓа на минатото
Реториката на победници и губитни во однос на датумот за ибзори е дел од демократските болести ткаени во изборниот процес, но факт е дека немаше аргументи кај опозицијата за одложување на изборите, изјави во Утрински брифинг, долгогодишниот новинар Зоран Иванов.
„Факт е дека Христијан Мицкоски мораше да попушти под притисокот на јавноста бидејќи немаше ниту еден аргумент да ги одложува изборите. Тезата околу здравјето на граѓаните од ден на ден стануваше се посмешна. Особено земајќи го предвид времето кое го нарековме „режим“, кога знаеме како функционираше ВМРО-ДПМНЕ, а актуелното раководство на партијата не се огради. И не им помина во јавноста “големата“ грижа за граѓаните. Барањата околу набљудувачи на ОБСЕ не дека променија нешто, бидејќи ОБСЕ/ОДИХР за секој изборен процес се овде и соопштија дека на барање на Владата тука се претстојните избори. Кога се дискутира за датумот опозицијата не беше во право и претера. До сега ќе завршевме со изборите, ќе имавме функционални институции“, смета Иванов.
Коментирајќи ги изјавите на првиот човек на Државната изборна комисија, Иванов смета дека {Дерковски} го покажал своето лице за време на референдумот, прогласувајќи го за неуспешен без да нагласи дека е консултативен, а таквиот не се мери во успешност.
„Сега со истата партиска реторика, убедува што е во ред а што не во однос на изборите, но претседателот на ДИК треба да знае дека правните дилеми во однос на изборите ги толкува друга институција. Што работат во ДИК целиов овој период додека мируваат? Најнепримерно беше неговото тврдење дека чека здравствени протоколи. Се знаат дел од тие мерки бидејќи се исти на изборите кои веќе се случија за време на пандемијата“, потенцира новинарот.
Нвинарот Иванов уште надополнува дека вокабуларот на опозицијата во своите критики кон оваа техничка влада беше јасен, а досега ги избегнуваше изборите и смета дека и 15.јули не ги радува опозициските редови.
„ВМРО-ДПМНЕ да можеа, ќе ја влечеа работата до сила, додека не папсаше ова општество економски и здравствено. Ако веќе алудираат дека техничката влада не е подготвена, а ја тераа кампањата дека Собранието не може да се состане и бегаат од избори…тогаш до кој степен треба да ја донесат државата во борбата за власт? Партијата ја нема хуманата димензија. Факт е дека и министерката Мизрахи и министерот Чулев настапија како класична партиска коњаница. Удрија кон пропаганда и кампања, ги искористија министерствата за лични агенди“, вели Иванов.
А во однос на вториот бран и падот на популарноста на министерот Венко Филипче, долгогодишниот новинар и уредник вели, Владата и Комисијата направија грешка што не направија длабока врска со општините.
„Македонија не го мобилизираше својот административен и политички одговорен потенцијал на локално ниво. Некој требаше да бдее над нашите глави, да укажува, но ние оставивме се на Владата и кризниот штаб“, рече Иванов меѓу другото.
Во идејата премиерот на државата да биде Албанец, тој не гледа ништо лошо, но тврди дека реториката на ДУИ во моментов го етнизира општеството, фрла ракавица на раздорот, излегува со дизајн кој според Иванов, ќе беше адекватен за 2001 година можеби.
„Ние па со години работиме на модернизација но без етнизирање по секоја цена како што тврди ДУИ. Ова што ДУИ го прави, со такво форсирање, не знам дали го прави за да си го крене рејтингот, но реториката воопшто не е добра, ние ова етнизирање го поминавме, не може да се враќаме назад“, смета Иванов.