24 часа пред влез во Грција мора да се пополни формулар со лични податоци и информации за престој

Од денеска Грција го отвора граничниот премин „Евзони“, со што се овозможува влез на македонските граѓани, но под одредени услови. Имено, во соседна Грција ќе можат да отпатуваат само оние кои ќе имаат обезбедено негативен ПСР тест не постар од 72 часа и ги имаат примено двете дози од вакцината против коронавирус. Важна информација за нашите граѓани кои ќе одлучат да отпатуваат во Грција е дека задолжително треба да се најават на грчка веб страна 24 часа пред пристигнување на граница, и да имаат пополнето формулар со лични податоци, контакт на лице во случај на итна потреба, како и адреса на престој додека сте во државата.

Петар Малев од туристичката агенција „Ескејп“ вели дека изненадувачки голем е интересот за патување во Грција.

– Веднаш штом ја дозна информацијата дека од денеска Грција ја отвора границата за влез на македонски државјани, граѓаните почнаа да се информираат за условите и можноста за патување. Посебен интерес за патување покажуваат тие кои имаат неискористени ваучери од созоната 2020. Морам да нагласам дека никој не смее да заборави да се најави во системот на Грција 24 часа пред патувањето, инаку влезот во државата ќе биде оневозможено. Ние секогаш кога ги креираме аранжманите се водиме од моменталните протоколи кај нас и во земјите каде што ќе се патува, објаснува Малев. Тој вели дека веќе имаат подготвено аранжмани за претстојниот продолжен викенд, односно за 24 мај, Денот на македонските просветители.

-Има интрес за патување во Црна Гора и Албанија. Исто така има интерес за патување и во Турција, но за таму е потребен ПСР тест. Во Будва за 24 мај може да се отпатува за 59 евра, аранжман со две ноќевања и вклучен превоз, информира Малев.