? Ракиќ: Вучиќ нема да дозволи фер избори додека има такви кои учествуваат на лажни избори
Србија ќе одржи избори за пет дена, а на избирачкото ливче ќе отсуствуваат неколку опозициски партии кои водат кампања за бојкот. За предизборието во Србија, бојкотот, одлуката на дел од партиите сепак да учествуваат на изборите, како и внатрепартиските несогласувања разговаравме со потпретседателката на Демократска партија, Драгана Ракиќ.
Во продолжение целосното интервју.
Пред се, каква е состојбата со корона вирусот во Србија, дали верувате дека може да се оди на безбедни избори и како ќе ја оцените вашата влада за справувањето со овој вирус?
Изборите кои ќе се одржат за неполни 6 дена, односно на 21 јуни, секако ќе бидат голем ризик за здравјето на граѓаните затоа што во Србија се уште не е помината опасноста од корона вирусот. Ние секј ден имаме нови заболени и за жал луѓе кои умираат како последица на оваа болест. Така што, опасноста се уште не е помината, но без оглед на тоа Вучиќ донесе одлука сепак да се одржат изборите затоа што додека имавме вонредна состојба, тој ја искористи таа вонредна состојба ја искористи за себе промоција и за зајакнување на својот култ на личноста. За жал, тој како и секој автократ, ја искористи оваа несреќа која ни се случува за да си го подигне сопствениот рејтинг и да претстави дека ја победил короната. З а жал, не ја победи, короната е и понатаму реална опасност за сите нас граѓани на Србија.
Демократската партија повикува на бојкот на изборите закажани за оваа недела, што очекувате да добиете од бојкотот и дали очекувате дека граѓаните ќе се одлучат на овој чекор.
Ние ги бојкотираме изборите затоа што изборните услови не се фер и чесни. За жал граѓаните на Србија немаат избор. Овие избори веќе однапред се украдени и кога немате слобода за слободно да ја формирате вашата изборна волја и да гласате без страв дека ќе останете без работа, тогаш тоа и не се избори. Бојкотот на изборите е само првиот чекор во нашата понатамошна борба за добивање слободни и чесни избори на кои граѓаните ќе можат да гласаат за оној за кој сметаат дека навистина има најдобра политичка понуда, а не од егзистенцијален страв дека ќе останат без работа ако не гласаат за владејачката партија. За жал таква е состојбата со демократијата денеска во Србија, односно отсуството на демократија и отсуство на фер и чесни услови за избори. По појавата на короната, изборните услови станаа само полоши. Ништо не се промени, а притисоот врз граѓаните станува се поголем, така што ние останавме доследни на нашата одлука од минатата година, дека на вакви избори, на кои победникот е веќе однапред познат, нема да учествуваме.
Вие ги бојкотирате изборите и ги нарекувате лажни, но сепак на листите има опозиција. Тука се партиите на Шешељ, на Јовановиќ, па и граѓанските движења како она на актерот Сергеј Трифуновиќ и 1 од 5 милиони. Дали сметате дека и тие се дел од таканаречените лажни избори, бидејќи и тие со вас излегоа на протест и во борбата против Вучиќ бевте на иста страна?
За жал некои партии се фатија на јадицата која им ја пушти Вучиќ. Вучиќ во изборна година, што не се прави во демократски земји, ги промени изборните условите. Тој го намали цензусот од 5 на 3 проценти, го промени начиннот на кој партиите собираат потписи, односно ги заверуваат потписите за својата кандидатура. Таа процедура ја олесни, така што некои партии во тоа видоа можност да влезат во парламентот и да добијат некои бенефиции за себе лично, односно ги ставија личните интереси пред интересите на овие граѓани и на целото општество. Вучиќ нема да дозволи фер и чесни избори се додека има такви кои сакаат да учествуваат на такви лажни избори. Ќе беше подобро целата опозиција да останеше доследна во ставот и да сите да го одржевме зборот. За жал, некои партии си го погазија зборот иако потпишаа договор со граѓаните и ветија дека ќе истаат во борбата за фер и чесни избори.
Споменавте дека бојкотот е само прв чекор, кои би биле следните чекори и како ќе влијаете ако останете надвор од парламентот?
Ние ќе се бориме. Сакаме да им покажеме на граѓаните дека нивниот интерес и интересот на целото општество го ставивме во прв план, а интересот на граѓаните е прво да можат да бидат информирани, да можат слобиодно да ја формираат својата изборна волја што денеска не е случај. Денеска државните телевизии и сите телевизии со национална фрекфенција се целосно под контрола на Вучиќ, на овој автократски режим и граѓаните немаат вистинска информација, затоа и не можат слободно да го формираат своето мислење. Затоа се бориме гласањето да биде без страв, да биде тајно гласање… Денеска во Србија имате случаи во кои се бара од гласачите да го фотографираат своето ливче за да докажат дека гласале за Вучиќ, што е противзаконскии. И бараме институциите да си ја работат својата работа, да постои контрола на целокупниот изборен процес, односно РИК, републичката изборна комисија да си ја работи работата која треба по закон да си ја работи. Тие тоа не го прават. Бојкотот е само прв чекор, бојкотот е почеток, тоа е процес. Ние ја продолжуваме борбата за слободна демократска Србија. Ние од тоа не се откажуваме. Ке се бориме со сите начини кои ги имаме. Успехот на овој бокот ќе се мери со брзината со која ќе се избориме за наредните слободни фер избори, затоа што ако прифатевме да бидеме дел од овие лажни избори ќе бевме соучесници на Вучиќ во понатамошното поткопување на ова општество. Бојкотот е отпор. Бојкотот е став и просто одбрана на граѓанското достоинство и на нашите права да не учествуваме во ваквви избори како што се одржуваат денес. Во Србија изборите се апсолутно недостојни за една демократска и модерна држава каква Србија претендира да биде.
Во последно време се појавија проблеми внатре во партијата. Потпретседателот Драгосав Шумарец побара вонредни избори за избор на ново раководство на Демократската партија, а и вие најавивте исфрлување на околу 30 членови. Што се случува внатре во Демократската партија? Дали ќе бидат одржани вонредни избори?
Во медиумите настана поголема бука за внатрешните случувања во демокатската партија, а реално нема никакви посебни судири. Нас демократите отсекогаш не красел богат внатрепартиски живот и ние сме партија во која живо се дебатира, партија во која луѓето имаат право на свое различно мисење. Но, денес имате состојба во која неколку поединци, навистина бал број поединци, ја прекршија одлуката која ја донесе Демократска партија на своите партиски органи каде изгласавме бојкот со огромно мнозинство на гласови. Од 180 членови на главниот одбор кои беа присутни на седницата, само 4 беа против бојкотот. Во меѓувреме, поедници наши членови преминаа во други партии кои излегуваат на изборите или формираа граѓански групи кои излегуваат на изборите. Нашиот Статут, на Демократска партија е многу јасен и прецизно дефинира дека секој кој учествува во друга политичка организација и ќе се најде на листа, дали за советник, дали за пратеник на друга партија или пак помага на друга партија, нему автоматски му престанува членството во Демократска партија. Нашиот извршен одбор само ќе го констатира тоа дека поединци одлучија да ја прекршат одлуката за бојкот и да излезат на избори. За тоа се работи. Значи тие триесетина членови на Демократска партија ја прекршија одлуката која ја донесовме со огромно мнозинство и ќе излезат на овие лажни избори на Вучиќ. На тој начин му дадоа легитимитет на Вучиќ и прифатија да му бидат конструктивна опозиција, да му помогнат пред јавноста, како домашна така и странска, да претстави дека овде е во ред, дека постои парламентаризам, дека постои повеќепартиски ситем, а во реалноста постои само една партија и Србија за жал се врати во времето на еднопартискиот систем. Што се однесува до нашите внатрепартиски избори, ова раководство кое моментално е на чело на Демократска партија е легално и легитимно избрано пред две години на нашето Изборно Собрание и ние имаме мандат уште две години. На секои четири години се бира раководство на Демократска партија со тоа што кога има избори и докколку партијата учествува на тие избори, тогаш Изборно Собрание може да се свика и по изборите. А бидејќи оваа година Демократска партија не учествува на изборите, нема никаква причина да се свика Изборно Собрание, односно ќе се свика кога ќе се стекнат услови за тоа. Пред тоа треба да се случат неколку работи, една од нив е и промена на Статутот, активно работиме на тоа и на промена на некои партиски акти или правилници затоа што имаме доста стар Статут кој не е прилагоден на околностите и на сегашната состојба. Имаме Акт и Статут направени додека бевме една голема партија на власт кога имавме многу членови и многу активисти. Тоа денеска не е случај, ние сме во опозиција и мора да бидеме ефикасни, а таа ефикасност ќе ја добиеме прво со промена на нашите внатрепартиски акти и Статутот, потоа ќе се случат и некои кадровски промени. Мора да видиме во меѓувреме кој ја прекршил одлуката на партијата и се зачленил во друга партија. И потоа, по изборите ќе дојде до обединување во Демократска партија. Неколку партии, групи на граѓани и политички организации сакаат да пристапат во Демократска партија. Кога сето тоа ќе го направиме, тогаш ќе свикаме и изборно Собрание на кое ќе бираме ново раководство на таа голема, обединета Демократска партија.
Во борбата протв Вучиќ, со другите партии сте поврзани во Сојуз за Србија, заедно ги бојкотирате изборите, а неодамна Демократска партија склучи договор за соработка со партијата на македонците. Што претставува оваа соработка?
Драго ми е што Демократска партија е побогата со нови пријатели и нови соборци, тоа е партијата на Mакедонците во Србија, чиј претседател е Горан Илијевски. Ние потпишавме договор за заедничка соработка, не само кога е во прашање бојкотот, туку и во понатамошната борба за слободна и модерна Србија и за подобри односи помеѓу Србија и Северна Македонија. Двете партии се со социјалдемократска ориентација, така што таа наша соработка во прв план има борба за човекови права, за малцински права и за тоа повеќе во Србија да не постојат граѓани од прв и втор ред. За жал, автократскиот режим на Александар Вучиќ, не подели на граѓани од прв и врот ред. Имаше многу неправилности при изборот на Националниот Совет за македонците и за сите малцинства кои живеат во Србија. Тоа е нешто што не би требало да биде дел од секојдневната политика, но за жал Српска Народна Партија успеа дури и тие демократски текови да ги сруши и сосема да го девалвира значењето на Националниот Совет кој малцинствата го имаат овде во Србија. Токму оваа соработка со Партијата на македонците во Србија е некој патоказ и ќе ни биде засилување во заедничката понатамошна борба за што подобри меѓудржавни односи помеѓу Србија и Северна Македонија.