Брдаровски во Скопски агол: Поставувањето на вендинг машини за селекција на отпад е примамлива понуда за граѓаните

Македонија доцни цели 50 години во посставување вендинг машини за селектирање отпад и поврат на средства. Кога да ги очекуваме првите вакви машини во Скопје и републиката, денеска во „Скопски агол“ на „Утрински брифинг“ зборуваше маркетинг менаџерот на Пакомак, Ико Брдаровски.

– Во соработка со Фондот за иновации и технолошки развој сме во процес за поставување на вендинг машини. Планираме на почетокот на следната година пилот машините да бидат готови, и да започнеме со нивно поставување. Најпрво ќе бидат поставени тестните машини и тоа на најфрекфентните места а потоа ќе го шириме поставувањето на машините, рече Брдаровски.

Тој нагласи дека за разлика од Скандинавските и останатите европски земји, во Македонија вендинг машините нема да враќаат пари, туку ќе даваат ваучери за услуги.

– Нашиот концепт е овие машини да враќаат услуги кои ќе ги користат граѓаните а не парични средства, од причина што ако враќаат пари, тогаш тој проект ќе треба да се воведе на цела територија на Македонија, а тоа е скапо. Ние ќе одиме општина по општина, град по град, а луѓето ќе имаат бенефити за паркинг, општински услуги и за пазарење во маркети, објаснува Брдаровски.

Тој информира дека проектот е прифатен од голем број на општини и се надева дека брзо ќе се прошири низ државата, но приоритет ќе има Скопје и пофрекфентните места.

– Бидејќи има различни типови на пластика, треба да се прави дополнителна селекција во отпадите, на пластични шишиња, прибор за јадење и играчки. Во поразвиените земји ваквата селекција се прави уште во контејнерите за селекција, но кај нас нема навика. Доволно ќе биде за почеток луѓето да сфатат дека навистина е потребно да се селектира отпадот и да научат на правилен начин тоа да го прават, завршува Брдаровски.