Лазаров: На македонската економија и треба преструктурирање на растот
Споредено со Западен Балкан, македонската економија се вбројува во државите со највиска негативна стапка на раст, вели професорот Дарко Лазаров, продекан на Економскиот факултет во Штип. Според Лазаров, неопходно е преструктурирање на стратегијата за раст.
„Македонската економија во 2020 година, како резултат на кризата од пандемијата со Ковид 19, заврши со 4,5% негативна стапка на раст, односно рецесија, што со исклучок на Црна Гора, која е неспоредлива, Македонија се вбројува во земјите кои имаат најлоши економски резултати во Западен Балкан. Србија имаше 1,1 рецесија, Албанија 3,3, БиХ 4,3, ние 4,5%. Дополнително загрижува што проекциите на Светска Банка укажуваат дека очекувањата со растот на македонската економија во 2021 не се толку оптимистички. Според нивната проценка, стапката на раст на македонската економија би била околу 3,6, а просекот на земјите од Западен Балкан се 4,4%. Прогнозите на ниво на ЕУ се 3,9%. Што значи Македонија ќе има најслаба стапка на раст, односно најбавно опоравување“, вели Лазаров.
Тој во Утрински брифинг, нагласи дека преку анализа на податоците од Државниот завод за статистика, Македонија има негативна стапка на раст во индустриското производство од -6,1% во првиот квартал од 2021 година, негативна стапка на раст во градежништвото, и дополнително, вели Лазаров, она што загрижува е фактот што во вториот квартал има сериозен проблем во текстилната индустрија.
„Во вториот квартал пак, има сериозен проблем во текстилната индустрија, а голем дел од компаниите најавуваат дека нарачките од странство се влошени и ќе има проблем до крајот на годината. Дополнително она што треба сериозно да го земеме во предвид се глобалните проблеми во ланецот на снабдување во автомобилската индустрија со чипови. Фактот што во вториот квартал имаше целосен локдаун на угостителскиот и туристичкиот сектор и ако го имаме предвид доцнењето на вакцинацијата, јас се плашам дека туристичката сезона ќе доживее дополнителен колапс. Ако ги земеме сите овие индикатори во предвид, можеме да заклучиме дека македонската економија не ја очекуваат добри времиња во 2022 годин“, анализира економистот Лазаров.
Тој смета дека она што е проблем во македонската економија е што парите кои државата ги дава за креирање на работни места, преку активните мерки на Агенцијата за вработување, биле неоправдани, затоа што најголем дел од тие работни места, вели тој, се неодржливи на среден и долг рок.
„Во таа насока потребни се посериозни структурни трансформации на македонската економија. Македонија мора да го смени методот на раст, кој ќе биде базиран на реиндустријализација, на извозно ориентиран раст и на раст кој ќе биде базиран на зголемување на продкуктивноста на македонската економија. Најголем проблем со кој се соочува македонската економија е ниската продуктивност. Ние треба да се преструктурираме од дејности кои имаат ниска продуктивност кон дејности кои имаат поголема додадена вредност. За тоа е поголем сет на реформи во кој сите ќе бидат вклучени, сразмерно на работната сила и на приватниот сектор“, заклучува продеканот на Економскиот факултет во Штип.